ليزر إزالة شعر الوجه - الحقيقة الكاملة .. د. جنة خداده
ليزر إزالة شعر الوجه ⚡️⚡️⚡️⚡️:
اليوم بتكلم عن حقائق و تجربه مع ليزر ازالة الشعر للوجه لان الجسم شي مختلف .
الحين بالنسبه لي ازالة شعر الوجه بالليزر زينه و مو زينه و شالقصد بهالشي ؟!؟!
زينه ان بعض الناس لما يسوون كذا جلسة لمناطق الشعر بالوجه يحصلون نتايج حلوه و مرضيه و ناس للاسف العكس .
شنو هذه النتايج العكسية اللي ممكن تصير عند البعض و حطوا مليون خط تحت البعض :
١- مافي نتيجة مرضية و الشعر يضل يطلع حتى بعد ٨ جلسة لكم
٢- ظهور حبوب بالوجه
٣- حروق الليزر
٤- معالجة الشعر الوبري بالليزر يخلي الشعر اللي يطلع داكن و خشن و سميك و مو حلو بتاتا
شنو الاماكن اللي ممكن تستفيد من ليزر ازالة شعر الوجه ؟!
الاماكن اللي فيها الشعر غليظ و واضح مو وبري و خفيف يعني منطقة الشارب او حوالين الحواجب و عند بعض البنات منطقة الذقن اذا كان فيها شعر كثيف و سميك و تعاني من داء الشعرانية او عندها تكيس مبايض مع فرط نمو للشعر بالوجه ممكن تعالجه بالليزر و استفداتها تصير افضل من لما يكون حق احد غيرها
الحقيقة كاملة :
نصيحة لازم تعرفونها و بختم فيها باختصار اذا كان في شعر وبري خفيف لا تسوين له ليزر لانه النتايج في كثير من الحالات اللي شفتها ماكانت مرضية نهائيا صار الشعر سميك و اسود و زاد نموه و في بعض الحالات الحبوب تبدي تظهر بعد المعالجة بالليزر عند بعض الحالات و اذا حابه تسوين سوي لمنطقة الشارب او المناطق اللي فيها الشعر سميك و واضح فقط
و لازم تعرفون ان جلسات الوجه لليزر تختلف عن الجسم مع المناطق المعالجة بالليزر صغيرة بس ممكن تاخذ وقت اكثر و جلسات اكثر و تتراوح بين ٦-١٢ جلسة و بين كل وحده و اللي بعدها شهر تقريبا و تختلف باختلاف الجسم و لان مو الكل واحد و هذي طبيعة اجسام
و غير جذي الشعر بعد انتهاء كل الجلسات عند بعض قد يتلاشى و يصير حيل خفيف نموه لفتره طويله و عند بعض البنات يرد يطلع بعض فترة و تحتاج جلسات بين فتره و فتره بس اقل من البداية و اما الشعر الوبري يفضل عدم ازالته باي طريقة سواء ليزر او غيرها و يفضل اذا مضايقكم تشقيره و هذا انسب حل و هذي الحقيقة كاملة و الخيار لكم 😍😍😍😍
اتمنى استفدتوا من الموضوع و منشنوا اللي ناوين يسوون ليزر للوجه لازالة شعرهم 💎💎💎💎💎💎💎💎
.
.
د.جوووووج
الاشتراك في:
تعليقات الرسالة
(
Atom
)
ليست هناك تعليقات :
إرسال تعليق