انتشرت صورة من جم يوم على ايد بنت و يقولون انها محترقه لان عقمت ايدها بأحد المعقمات و دخلت المطبخ تطبخ و تعرضت  لحروق اهيا كانت السبب بشكل ايدها 🤚🏼 🤚🏼الموضح بالبوست فوق.

الحين وجهة نظري بهذا الموضوع و بواقعية و تحليل و بالتالي النتيجة اللي نبي نطلع فيها من هالبوست عشان الكل يستفيد :

الصورة فيها حد فاصل بين اصابة الايد و الجلد الطبيعي لو تلاحظون و الحد الفاصل هذا صاير خط مستقيم مما يدل طبيا على اجراء طبي تجميلي علاجي  نسميه skin graft او عملية ازالة نسيج الجلد لاستخدامه لاي غرض او لتغطية مكان اخر بالجسم متشوه او متعرض لحروق قويه و الجزء المزال كبير و قد مايكون نتيجة حرق و الله اعلم .

المعقمات بشكل عام اذا حطيناها احنا نفركها لغاية ما تجف و الجفاف هذا يدل انه مواد الكحول اللي فيها القابلة للاشتعال كلها تطايرت فشلون ببتتطاير و بتشب على جسمنا ؟! و لاحظت قاعدين يسوون تجربة بالواتساب كثير من المؤثرين و يحطون كمية من المعقم على سطح و يشبونه و يقربون منه منديل فيشب !! 

ماهو طبيبعي لانك انت اساسا ما فركته بجسمك لين تطاير وجف الكحول اللي فيه و انت حاطه على عداله و بكمية و ياي تشبه .. هذا يدل ان الكحول بالمعقم اذا استخدم عالايد و تم فركه بالجلد بيتطاير .. هذا الا اذا غرقنا ايدنا و لي الحين ماجفت و رحنا صوب النار و هالشي نادر يصير لان احنا نحط المعقم و نفرك فيه الايد و نمسحها 👍🏼👍🏼

و هو الاهم و المهم من كل هذا البوست 🤓🤓🤓🤓.. الحين اذا انتو بالبيت و بمطبخكم و المطبخ فيه مغسله و ماي و صابون يعني مو طالعين بره تقضون مشاوير !! الاولى انكم تغسلون ايدكم بالماء و الصابون افضل و لا تستخدمون المعقمات ؟! ... 

ما يبيلها كلام الماء و الصابون افضل بمليون مره و تغسل الايد لمده لا تقل عن ٢٠ ثانيه و بتتعقم افضل من اي معقهم على توجيهات منظمة الصحة العالمية على مستوى العالم .. فبالتالي المعقم خلوه للمشاوير و انتو برة و ما يمكم مغسله و لكن بالبيت و بالمطبخ و الماي موجود ماشوف في حاجة لمعقم لان الماي و الصابون هي الطريقة الافضل لتعقيم اليدين ✅🤚🏼😍😍 ..