هل الإكثار من كمية كريم أو سيروم للوجه تفيد أم تضر

بعض البنات طريقة  استخدامهم .. تصدم !!! فخلوا بالكم، بعض الاحيان اتيي حالات تكون ماخذه وصفه عالاقل تكفيها شهر او شهر ونص من كريم او سيروم .. واكتشف بعد اسبوعين انه خلص المنتج من عندها 😱.. فلما راجعت معاها طريقة الاستخدام لاحظت في سوء استخدام وبكميات كبيرة للكريم وكأنها قاعده تحط ماسك مو مرطب او مقشر 😭.. الان انيي حق الطريقه اللي تخليكم تستخدمون المنتج بطريقة صحيحة.

الكميه الصحيحة لوضع كريم الوجه لافضل النتايج

نفس ما وضحت بالفيديو الكميه وهي نقطه صغيره حوالي ١ سانتي وتوزع على الخدين والانف والجبهه والذقن والمتبقي على الرقبه وهالشي كافي. 

طريقة استخدام كريمات وسيرومات الوجه

بنات لازم تعرفون مو كل ما كثرتوا من المنتج بتحصلون نتايج افضل ولكن على العكس لان لو كان الكريم تقشيري وزدتي منه راح تحصلين بشرة ناشفه وحمرا وفيها تحسس وحتى لو كان الكريم او السيروم ترطيبي وحطيتي وايد قد يزيت البشرة او يطلع حبوب .. لذلك الوسطيه بكل شيء هي الحل فخلوا بالكم وفوق هذا كله بدل لا بالشهر تشترين كريمين اثنين .. قد تحتاجين كريم واحد يكفيج فوق الشهر فحتى ماديا اوفر لكم.

المجموعة كلها حلوه للامانه وفوق هذا كله شامله مو بس غسول وتونيك حتى سيروم وکریم صباحي وليلي واحلى حماية من الشمس معاها.
جمال المنتجات لا يوصف بصراحه وايد عندهم اشياء حلوه انا سنين اتكلم عنها لانها تستحق وانا جدا اثق فيها وبنتائجها على البشرة.

طريقة وكيفية استخدام غسول الوجه

كم مرة استخدم غسول الوجه ؟ من الاسئله المتكرره اللي تمر علي بشكل يومي .. دكتورة كم مره اغسل وجهي بالغسول المخصص للوجه .. هل مره ؟!.. هل مرتين ؟! هل مو كل يوم ؟! طبعا الاجابة كالتالي :
غسل الوجه بالغسول يحدد بشكل عام على عنصرين مهمين ومافي قاعده معينه لذلك:
1- نوع البشرة ( جافه ، عادية ، حساسة ، مختلطة او دهنية ) ولمعرفة نوع بشرتك، هنا شرح كامل عن أسهل طريقة لمعرفة نوع البشرة.
2- نوع الغسول وتركيباته.

فيعني اصحاب البشرة الدهنية غالبا تحتاج يوميا تغسل بشرتها وممكن مرتين باليوم بعد .. اما اللي بشراتهم عاديه يكفي مره باليوم واللي جافه قد ماتحتاج تغسل بشرتها يوميا بغسول للوجه.

طريقة اختيار الغسول المناسب للبشرة

النقطة الثانية والمهمة يعتمد على نوع الغسول اللي تستخدمينه وتركيباته .. ساعات حتى البشرة الدهنية اذا استخدمت انواع الغسول المخصصه للبشرة  الدهنية لما تغسل مرتين باليوم تجف بشرتها وتلاقي نفسها اذا استخدمت الغسول مره باليوم افضل .. اعتقد وضحت الصورة.

لازم تعرفون نوع بشرتكم اولا وثانيا انتقاء غسول يناسب نوعيتها وبعدها مع الاستخدام راح تعرفون انتو بنفسكم شنو عدد المرات اللي المفروض تغسلون فيها بالغسول سواء مرتين يوميا او مره يوميا او ثلاث مرات بالاسبوع بحيث ماتتهيج البشرة ولا يصيبها جفاف.

واي غسول حسيتوه ماناسبكم بدلوه فورا لغاية ما تلاقون شي ناسبكم، لان القاعده العامه مره يوميا نغسل الوجه بالغسول  ولكنها ليست قاعده ثابته  وقد تتغير وتحددها عوامل نفس ماقلنا مسبقا نوع بشرتكم والغسول اللي ترتاح له وطريقة استخدامه.