طريقة استخدام فيتامين سي مع مقشر البشرة دكتوره جنه خداده
طريقة إستخدام كريمات التقشير مثل كريم سكينورين وكريم ديفرين مع سيروم فيتامين سي
من المشكلات اللي تواجه اغلب البنات من بعد اختيار المنتجات للبشرة تكون في كيفية ترتيبها واستخدامها وهذه الفتره راح اشرح شي شي لكم وارتب المواضيع بحيث بكل موضوع نتطرق لنقطة ونفصلها وتكون واضحة وتستفيدون منها.
اللي بتطرق له اليوم هوا اذا البنت تستخدم مقشرات الوجه وهي كثيرة ولكن بحط بعضها وهم : سكينورين او الديفرين والاستخدام لهم قلنا بليل ولازم مايكون في تعرض للشمس وشرحنا طريقة إستخدامهم في هذا الموضوع 🤚🏼🤚🏼 طيب بعد هذه المقشرات بالعناية الليلية هل اقدر استخدم سيروم الفيتامين سي او لا ؟!
باختصار استخدام المقشر تقدرون تحطون بعده مستحضرات العناية الخالية من المقشرات عشان مايكون في تعارض مع المقشر فتقدرين تستخدمين الهايلورونيك اسيد و سيرومات الشد وغيرها، ولكن عند إستخدام فيتامين سي لنضارة البشرة الرائع، في نقطة مهمة ان اهوا عند البعض يقشر خفيف جدا فيسبب جفاف حتى لو كان عند فئة بسيطة فبالتالي البنت اللي تستخدم المقشر واتحط بعده الفيتامين سي اذا كانت بشرتها حييل حساسة او جافة ونسبة فيتامين سي عالية فيصير جفاف واحمرار وتهيج ولا ينفع خلط فيتامين سي مع المرطب لأنه سائل ، إذا شالحل ؟!
هل يمكن استخدام سيروم فيتامين سي مع كريم التقشير؟
الحل : يختلف على حسب كل بشرة فاذا كانت البنت تستخدم المقشر بليل واعتادت عليه بشرتها ولا تحس ان قاعد يهيج بشرتها او يجففها حيل وخاصة ان اهيا بالعناية الليلية قاعده تحط مرطبات مثل كريم بيبانثين بعد المقشر فتقدر مرتاحة تدخل سيروم فيتامين سي من ضمن العناية الليلية بعد المقشر عادي.
اما اذا كانت مع المقشر تحس بتهيج وتحسس ولم تعتد البشرة بالكامل عليه فتفصل بين فيتامين سي و المقشر و تخلي المقشر بليل ثابت او تستخدمه يوم و ترك و تخلي فيتامين سي بأي وقت مختلف من اليوم افضل عشان تتجنب هالشي.
اما عن نفسي بشرتي اعتادت على المقشرات فالبنات يشوفون لما احط العناية الليلية احط المقشرات و بعدها كذا سيروم عنايه ليليه من ضمنهم فيتامين سي والنتيجة روعه ولكن مو كل البشرات نفس الشي او طبيعتها وحده والاختلاف طبيعي فالبنت اللي تحس بشرتها تتحمل تحط فيتامين سي بوقت مختلف من اليوم عن وقت المقشرات الليلي.
خلط سيروم فيتامين سي مع كريم تقشير
هذا الشرح مو بس لمقشرات الرتن اي المعروفه، ولكن أقصد التقشير بشكل عام سواء فيها او باحماض الفواكه او الريتينول و فيتامين سي بشكل عام بتراكيزه المختلفه و بالبراندات المختلفه بس القصد بالجمع بين المقشرات ليلا و فيتامين سي واتمنى النقطة وضحت وكل بنت عطيتها طريقتين وتستخدم الطريقة اللي تناسب بشرتها 😍 ولا تنسوا، لا تستخدمون سيروم فيتامين سي والتعرض للشمس بدون إستخدام واقي الشمس في النهار والضوء حتى لا يحدث أضرار للبشرة.
اتمنى الموضوع نال على اعجابكم .
..
د.جوووووج
قد يهمك أيضا
الاشتراك في:
تعليقات الرسالة
(
Atom
)
ليست هناك تعليقات :
إرسال تعليق