ماهي الخلطة الثلاثية 

الخلطة الثلاثية هي عبارة عن ثلاث كريمات كلها متوفره بالمراكز الصحية لدى اقسام الجلدية بالمجان ومتوفرة بالصيدليات بأسعار معقولة والمفروض بوصفة طبيه.

ليش سميت خلطة ثلاثية ؟!

لان نخلط بكل مره بنستخدمها شوي من كل كريم من الكريمات الثلاثة.

ماهي كريمات الخلطة الثلاثية ؟!

1- كريمات رتين A ؛ مثال كريم الاكرتين او الديفرين كريم و ليس الجل لانه الكريم اخف عالبشره بهالخلطه يعني الخلطه فيها مقشر مو شرط يكون مكتوب عليه ديفرين او اكرتين لان حسب الشركة المصنعة فدايما شوفوا الاسم العلمي.
يعني الاكرتين [ الاسم العلمي له تريتينوين] والديفرين [ الاسم العلمي له ادابالين]

2- مفتح او مبيض الهيدروكوينون مثل هاي كوين 4% او ساعات ينكتب عليه الدوكوينون %4 نفس الشي اثنينهم وعلى حسب اسم الشركة المصنعة ولكن المهم يكون كريم هيدروكوينون.

3- كريم هيدروكورتيزون 1٪ خفيف
مثال الالفاكورت Alfacort او ينكتب عليه الهايدروكورت نفس الشي اثنينهم بس على حسب المتوفر بس قاعده اكتب لكم المسميات الدارجة بشكل عام بس التركيبه لهم وحده.

لأي غرض تستخدم الخلطة الثلاثية 

تستخدم لتفتيح وتوحيد لون البشره وللتصبغات و للكلف و اثار حب الشباب [ يعني علاج للبشرة المتصبغة ]

موانع استخدام الخلطة الثلاثية

1- ممنوع للحامل و للمرضع لانه فيها ترکیبات ممنوعة الى الحامل والمرضع وهنا شرح البديل الآمن لتفتيح الوجه.
2- لبعض البشرات الحساسة والوردية.

الاماكن اللي تستخدم لها الخلطه الثلاثيه

1- الوجه ممتازه بس بعيدا عن محيط العين و حوالين الفم. 
2- اي منطقه بالجسم ماعدا المناطق الحساسه لا تستخدم لها. 
3- بالنسبه للمفاصل الركب والاكواع زينه بس مو نفس الوجه لانه عند البعض قد تسبب نتایج عکسیه.

طريقة استخدام الخلطة الثلاثية

1- نغسل الايد عدل و الوجه بعدها نخلط نقطه بسيطه من كل كريم بوقت الاستخدام و ما نخلط كميه كبيره من كل الكريمات و نخزنها و نستخدمها خطأ جذي يصير.

2- طبعا لانه فيها مقشر فتستخدم مره ليلا على الوجه بعيد عن العين و الشفاة وبأول ايام عشان تعتاد البشره نحطها شوي و اذا حسينا بحرقه ممكن نغسل المنطقه و مع الوقت راح تقدرون تنامون فيها يعني بأول اسبوع يفضل كل يومين او حتى كل ثلاث ايام مره. 

3- مع الوقت استخدامها يصير يومي . لمدة ٣-٤ اشهر بعدها نوقفها تدريجيا اسبوعين قبل لا نقطعها وناخذ حتى شهرين او ثلاثة و ممكن نرد عليها مره ثانيه عند الحاجه فقط. 

4- الخلطة ما تتعارض مع العناية الليلية من كريمات و سيرومات ترطيب، اهم شي ما يكون بهالعناية تقشير عشان لاتتحسسون. 
5- في صباح اليوم التالي من استخدام الخلطة : يغسل الوجه و يرطب و يجب وضع حماية من الشمس قبل الخروج من المنزل صباحا بنص ساعة عشان لا تأثر الشمس على الوجه.