علاج علامات تمدد الجلد

علامات تمدد الجلد تعتبر ما في يعني أحد ما مر بها المشكلة، أو يعني نقول الغالبية سواء من البنات إللي كثرة الحمل والولادة، تغير الوزن متن وضعف، المراهقين عندهم أمور معينه الشباب مثلا لما يصير عندهم نمو بالعضلات. 
طبعا التمددات هذه شنو علاجها؟ فيها وايد كلام، طبعا أهمها طبعا يقولوا لك كثرة شرب الماي، الرياضة، المحافظة على الوزن المثالي، إنه ما تمتنين وتضعفين وغيره من الأمور، ولكن بشكل عام إذا كانت توه تمددات ظاهرة عندك وفيه منهم تمدادات تكون بالبداية حمراء، سارعي في علاجها لا تتأخرين، فيه أنواع من الليزر لعلاجها بالعيادات تكون موجودة. وكذلك إذا إنتي مو حابة وتبي تجربين أشياء طبيعية، راح تاخذين مجهود، ولكن ممكن تجربين الزيوت الطبيعية منها زيت الارجان منها زيت اللوز الحلو، ثلاث لأربع مرات باليوم على الأقل على مناطق التمدد، ممكن تشوفين نتايج في حالات تشوف نتايج وتكون بشكل كبير يعني فوق 50% تستجيب لزيوت الطبيعية والنصايح إللي قلتها.

الكلف من المشاكل الجلدية إللي منتشرة يعني يشوفها وايد، يعني مثلا من بين عشرة مراجعين في العيادة، على الأقل أشوف ستة عندهم إحدى المشاكل إللي تكون تصبغات البشرة أو كلف، تختلف الأسباب، تغيرات هرمونية، عوامل وراثية، سوء استخدام المنتجات، نتائج عكسية من شي، عوامل الشمس وغيرها. 
انزين شنو العلاجات، إذا إحنا ما راح نتكلم، طبعا يحتاج كلام طويل إللي هو العيادات وعلاجات العيادات من ليزر وغيره، ولكن كروتين دايما أقول حق البنت فعلي أشياء تقشيرية بروتين العناية الليلي، خلطة ثلاثية، خلطة ثلاثية بالتبادل مع سكينورين، أو خلطة ثلاثية مثلا بالتبادل مع أحماض الفواكه، كذلك دششي بروتين اذا ما عندك تحسس من فيتامين سي وايد حلو، مو بس حق النضارة، ترى حتى في نسب ساعات تساعد بتفتيح الكلف وتقشيرة، ففيه وايد أنواع من الكريمات والأشياء إللي ممكن تبتدين فيها من البيت وتفيدك.

الهالات السوداء من أكثر الأشياء إللي تعطي البنت عمر كبير، يعني تلقين بشرتها حتى لو كانت زينة بس منطقة حول العين عندها تعبانة اتبين البنت مرهقة أو بشرتها تعبانة، ولكن لازم تعرفون، طبعا أنا دائما أقول: نوم كافي، أكل صحي، الهيموجلوبين يكون بالدم ما عندك فقر دم أو نقص في المخزون يأثر طبعا على المنطقة حول العين، اذا كان كل هذا تمام لازم تعرفون ان في عوامل وراثية وهذه تعتبر من اصعب الحالات العلاجية يعني حتى في كريمات ما رح تنفع.
 انزين اذا ما كانت العوامل وراثية في اشياء معينة ممكن تستفيد منها البنت: حقن الميزو مواد التفتيح حولين العين، وكذلك البلازما ممكن تستفيد من البلازما واذا كان في تجويف ممكن تستفيد بنسبة خفيفة من حقن الفيلر إذا كان عندها تجويف هو إللي مخلي منطقة السواد واضحة عندها تحت العين هذا بشكل عام.

سبب تساقط الشعر عند الرجال

تساقط الشعر عند الرجال طبعا سؤاله جدا واضح يقول إنه بحكم إنه الغترة وكذي إحنا مثل ما تعرفون حتى البنات عندنا لما نسوي تسريحة ونشد مع الوقت ممكن يصير عندنا ثعلبة الجر، فنتجنب هذا الشيء بحكم إنه هما يضطرون إنه يلبسون هذا الشي بشكل مستمر ممكن يصير تساقط، ولكن أغلب الحالات عند الرجال يكون فيه عوامل وراثية قوية، يعني لا بد تلقون أحد من العائلة يكون عنده مثلا بداية صلع أو عنده صلع من الأهل، الإخوان، أحد قريب منه، أو ممكن يكون بدا فيه هو، فدائما إحنا نقول لهم الخيار الأسلم إللي لا توقفونه، ما أنتوا مضطرين توقفونه، إللي هو المينوكسديل مثل السحر محلول المينوكسيديل سواء الفوم سواء الرغوة إللي يصير ك رغوة وفوم أو سواء المحلول، يستخدم مهم جدا جدا إن تبتدونه، الأشياء الثانية عاد تساعد إللي ممكن بلازما وهالأمور هذه ما في مشاكل، ولكن إذا مدخلين البلازما ما رح نستفيد إن ناخذها ونحقنها بالفروة دام في تدخين، ولكن أنصحك من الآن تبتدي محلول المينوكسديل لأن سحري في التساقط.

من علاجات الفرد بالصالونات كثير من البنات إللي تجي شعرها يكون تالف تماما، طبعا هذه إحدى الحالات تقول دكتورة أبي شيء يرجع للشعر حيويته، طبعا إذا عندك تساقط لابد إنه تسوين تحاليل تساقط الشعر، وتأكيدين إن كل أمورك تمام، تقصين الشعر على الأقل التالف من شعرك حاليا، وتبتدي نصيحتي لك على الأقل بزيوت طبيعية بالبيت، اللي هي عالأقل على الفروة مرتين بالأسبوع زيت اكليل الجبل، الزيت يكون طبيعي تخلينه على فروتك فترة وتغسلين شعرك، وعلى باقي الشعر تقدرين تكتفين بزيت الارجان أو زيت اللوز الحلو أو زيت جوز الهند وايد حلو، يعني هذه الزيوت إللي تحطينا على كامل الشعر، ولكن الفروة ممكن تكتفين الآن بزيت اكليل الجبل، طبعا هذه من الأشياء إللي ما تكلفك ماديا وحلوة إنك تبتدين فيها، ولكن لا تنسين بعد التحاليل.